Nënkryetari i Gjykatës Themelore të Gjakovës, Drilon Haraçia, ka pritur në takim kryetarin e Gjykatës Supreme, Fejzullah Rexhepi, kryesuesin e Këshillit Gjyqësor të Kosovës (KGJK), Albert Zogaj, kryetarin e Komisionit për Përmirësimin e Qasjes në Drejtësi, gjyqtarin Afrim Shala, si dhe drejtorin e Sekretariatit të KGJK-së, Shkelzen Maliqi.
Ky takim kishte për qëllim monitorimin e zbatimit të planeve strategjike, vlerësimin e progresit në zgjidhjen e lëndëve, rritjen e performancës, uljen e numrit të lëndëve të pazgjidhura dhe realizimin e normës së lëndëve të trajtuara.
Nënkryetari Haraçia theksoi përkushtimin e gjyqtarëve për zbatimin e Planit Strategjik për Përmirësimin e Qasjes në Drejtësi, si dhe Planit Strategjik për zgjidhjen efikase të lëndëve të korrupsionit dhe krimit të organizuar. Ai shprehu gatishmërinë për bashkëpunim me qëllim të rritjes së efikasitetit, transparencës dhe llogaridhënies në sistemin gjyqësor.
Kryetari i Gjykatës Supreme, Fejzullah Rexhepi, foli për rëndësinë e unifikimit të praktikës gjyqësore.
Nga ana tjetër, Kryesuesi i KGJK-së, Albert Zogaj, vlerësoi përmirësimet e dukshme të Gjykatës Themelore të Gjakovës, veçanërisht në zvogëlimin e lëndëve të vjetra, me një progres të ndjeshëm në degën e Malishevës.
Kryetari i Komisionit, Afrim Shala, shtoi se Departamenti për të Mitur në këtë gjykatë është më i suksesshmi në nivel vendi për trajtimin e lëndëve të vjetra, ndërsa Departamenti për Krime të Rënda ka shqiptuar numrin më të lartë të dënimeve me burgim efektiv në rastet e korrupsionit.